Azərbaycan Respublikasının Mənzil İnşaatı Dövlət Agentliyi 2024-cü ili 2 milyon 692 min manat xalis mənfəət ilə başa vurub. Agentlik 2023-cü ili 8 milyon 101 min manat xalis mənfəət ilə bağlamışdı. Beləliklə, Mənzil İnşaatı Dövlət Agentliyinin xalis mənfəəti 2024-cü ildə 2023-cü illə müqayisədə 3 dəfə azalıb.
Marja.az qurumun 31 dekabr 2024-cü il tarixində bitən il üzrə maliyyə hesabatlarına istinadən xəbər verir ki, ötən il Mənzil İnşaatı Dövlət Agentliyinin maliyyə gəlirləri 1 milyon 346 min manat və ya 11,7% artaraq 12 milyon 857 min manat təşkil edib. Həmçinin, Agentlik "Maliyyə aktivləri üzrə xalis dəyərsizləşmə üzrə bərpası" hesabı üzrə 334 min manat, "Diskontun amortizasiyası" hesabı üzrə 2 milyon 621 min manat gəlir əldə edib.
2024-cü ildə Mənzil İnşaatı Dövlət Agentliyinin 15 milyon 812 min manat gəlirlərə qarşı cəmi xərcləri 13 milyon 120 min manat təşkil edib. Xərclərin 7 milyon 126 min manatı kreditlərin ədalətli dəyəri üzrə zərər ilə bağlıdır.
Azərbaycan Respublikasının Mənzil İnşaatı Dövlət Agentliyi - Azərbaycan vətəndaşlarının, xüsusilə az və orta təminatlı vətəndaşların, gənc ailələrin mənzil probleminin həll edilməsi siyasəti çərçivəsində yaradılıb. Bununla yanaşı, ölkədə çoxmənzilli yaşayış binalarının tikintisinə rəvac vermək, Respublika vətəndaşlarının güzəştlə mənzillər əldə etmələrinə şərait yaratmaq, çoxmənzilli yaşayış binalarının tikintisi üçün ayrılan maliyyə vəsaitlərindən səmərəli istifadə edilməsini təşkil və təmin etmək məqsədilə Mənzil İnşaatı Dövlət Agentliyinin tabeliyində “MİDA” Məhdud Məsuliyyətli Cəmiyyəti yaradılıb.
